महाराष्ट्रका ९० प्रतिशत ओला शोरुम बन्द गर्न निर्देशन, यस्तो छ कारण

महाराष्ट्र सरकारले ओला इलेक्ट्रिकलाई आफ्नो राज्यमा रहेका ९० प्रतिशत शोरुम बन्द गर्न आदेश दिएको छ ।

नियम उल्लघंन गरेको आरोप लागेपछि राज्य सरकारले ३८८ वटा शोरुम बन्द गर्न आदेश दिएको हो । महाराष्ट्रमा ओलाका ४३२ आउटलेट सञ्चालनमा छन् ।

राज्यको यातायात मन्त्रीलाई लेखेको पत्रमा, यातायात विभागले आवश्यक ट्रेड सर्टिफिकेट नभएका स्टोरहरू विरुद्ध कारबाही गरिएको बताएको छ । राज्य यातायात विभागका अनुसार, ४३२ शोरूम मध्ये केवल ४४ आउटलेटहरूसँग मात्र ट्रेड सर्टिफिकेट थिए ।

ओला इलेक्ट्रिकले भने यी रिपोर्टहरूलाई सट्टाबाजी र गलत भन्दै अस्वीकार गरेको छ ।

महाराष्ट्र ओला इलेक्ट्रिकको लागि सबैभन्दा ठूलो बजार मध्ये एक हो, जसले गत आर्थिक वर्ष कम्पनीको कुल बिक्रीको लगभग १२ प्रतिशत हिस्सा ओगटेको थियो ।