उत्कृष्ट माइलेज र बलियो सुरक्षाका साथ २०२५ सुजुकी अल्टो फेसलिफ्ट

सुजुकीले जापानी बजारमा २०२५ को लागि अल्टोको नयाँ फेसलिफ्ट संस्करण पेश गरेको छ। सानो कारको केई कार श्रेणीमा पर्ने सो नयाँ अल्टो भारत वा नेपालमा पाइने अल्टोभन्दा पूर्ण रूपमा फरक छ ।

नवौं पुस्ताको सो मोडल पहिले २०२१ मा लन्च भएको थियो । त्यसकै फेसलिफ्ट संस्करणमा कम्पनीले फ्रन्ट ग्रिल, बम्पर र एयर इन्टेक जस्ता कस्मेटिक परिवर्तन गरेको छ । पछाडिको भागमा रूफ स्पोइलर थपिएको छ, जसले डिजाइनमा स्पोर्टी स्पर्श ल्याएको छ।

कारको एयरोडायनामिक्स सुधारिएको कारण यसको माइलेजमा पनि सुधार आएको छ। यसमा रहेको ६६० सीसी ३-सिलिन्डर इन्जिन नेचुरली एस्पिरेटेड र माइल्ड-हाइब्रिड दुबै विकल्पमा उपलब्ध छ। हाइब्रिड संस्करणले प्रति लिटर २८.२ किलोमिटर माइलेज दिन्छ ।

यसमा ७ इन्चको टचस्क्रिन इन्फोटेनमेन्ट सिस्टम समावेश गरिएको छ । यसको हाइब्रिड संस्करणमा लेदर स्टेयरिङ ह्विल, क्रोम डोर ह्यान्डल र स्टिल ह्विल समावेश छ । साथै सेफ्टीका लागि कार अब एडास प्रविधिसहित आएको छ। यसमा ड्युअल सेन्सर ब्रेक सपोर्ट आईआई, लेन डिपार्चर प्रिभेन्सन र ट्राफिक लाइट डिपार्चर नोटिफिकेशन जस्ता फिचर उपलब्ध छ ।

यसको मूल्य जापानी बजारमा ११ लाख ४२ हजार ९०० येन बाट सुरु हुन्छ भने शीर्ष संस्करण १६ लाख ३९ हजार येन पर्छ।