tvs-race

टेस्लाको ब्याट्रीलाई एक पटक फुल चार्ज गर्दा ३ सय किलोमिटर चलाउन सकिन्छ । यस्तै रेन्जमा हाल विभिन्न कम्पनीले इलेक्ट्रिक गाडीका लागि ब्याट्री प्रयोग गरिरहेका छन् ।

तर के एक पटकको फुल चार्जमा २ हजार ४ सय किलोमिटर गाडी चलाउन सकिन्छ ? डेली मेलमा प्रकाशित समाचार अनुसार अब यो सम्भव भएको छ ।

बेलायतस्थित पूर्व नाभी कर्मचारी ट्रेभर ज्याकसनले यस्तै ब्याट्रीको विकास गरेका छन् । हाल प्रचलित लिथियम आयोन ब्याट्री नभएर यो चाहिं आल्मुनियम–एयर ब्याट्री हो । यसलाई सानो स्थानमै राख्न सकिन्छ, तौल पनि थोरै छ र यसले जहाज समेत चलाउन सक्छ ।

ज्याक्सन आफैले विकास गरेको यो ब्याट्रीलाई व्यावसायिक रुपमा प्रयोगमा ल्याउनका लागि मल्टी–मिलियन डलरको प्रस्ताव आएको छ । अस्टिन इलेक्ट्रिकले यसका लागि सम्झौता गरेको छ र अर्को वर्ष देखि १ हजार भन्दा बढी गाडीहरु यो ब्याट्रीबाट चल्ने छन् ।

सो ब्याट्रीको मूल्य पनि हाल प्रचलित लिथियम आयोन ब्याट्री भन्दा निकै नै कम छ । टेस्ला कार ब्याट्रीलाई ३० हजार पाउन्ड पर्छ भने आल्मुनियम–एयर ब्याट्रीलाई लगभग ५ हजार डलर मात्र पर्नेछ । त्यसैगरी यसलाई रिसाइकल गर्न समेत सकिन्छ, जसले गर्दा वातावरण संरक्षणमा समेत सहयोग पुग्ने छ ।