Check, click, shop
अटो शो र चाडपर्व लक्ष्यित छुट्टै स्किम ल्याएका छौ

नरेश प्रधानले माछापुच्छ्रे बैंकको कन्जुमर बैंकिङ अन्तर्गत होम लोन, अटो लोन, पर्सनल लोन आदि व्यवस्थापन गर्छन् । बैंकिङ क्षेत्रमा १३ बर्ष भन्दा लामो अनुभव भएका र माछापुच्छ्रे बैंकमा विगत ३ वर्ष भन्दा लामो समय देखि कार्यरत प्रधानसँग अटो लोन र अन्य विषयमा गरिएको कुराकानी 


अटो लोनमा माछापुच्छ्रे बैंकको अवस्था कस्तो छ ?
अटो लोनमा हामी राम्रो तरिकाले अगाडि बढिरहेका छौ । हालै सम्पन्न नाडा अटो शोलाई लक्ष्यित गरी एउटा थप स्किम ल्याएका थियौं । यस अन्तर्गत हामीले १० बर्ष सम्म किस्ता तिरेर गाडी किन्न सकिने व्यवस्था गरेका छौ ।

१० बर्ष नै किन ?

सामान्यतः ७ वा ८ बर्षको ट्रेन्ड देखिन्छ । तर हाल बजारमा राम्रा गाडी आइरहेका र १० बर्ष सम्म राम्रो कन्डिसनमै रहने हुनाले हामीले १० वर्षको प्रावधान ल्याएका हौ । नेपाल राष्ट्र बैंकको नीति अनुसार गाडी किन्न चाहनेले बैंकबाट ६५ प्रतिशत भन्दा बढी ऋण लिन नपाउने अवस्था छ । पहिले गाडी विलाशिताको साधन मानिन्थ्यो । तर हाल आएर यो विलाशिताको साधन नभई आवश्यकता बनिसक्यो । त्यसैले अलि थोरै मात्र इएमआई तिर्न सक्ने अवस्था भएकाहरुलाई समेत समेट्न सकियोस् भनेर हामीले यो स्किम ल्याएका हौ ।

नरेश प्रधान
प्रमुख, कन्जुमर बैंकिङ सेगमेन्ट
माछापुच्छ्रे बैंक लिमिटेड


राष्ट्र बैंकले ल्याएको ३५ प्रतिशत डाउन पेमेन्ट ६५ प्रतिशत अटो लोनको नीतिले बैंकको गतिविधिमा कस्तो असर पुगेको छ ?
राष्ट्र बैंकको यो नीतिले बैंकहरु भन्दा पनि अटोमोबाइल डिलरहरुको व्यवसायमा बढी असर पुग्ने हो । सुरक्षित लगानीको हिसाबले त बैंकहरुलाई झनै फाइदा पुग्छ । यसबाट बैंकहरुको लगानी डुब्ने खतरामा कमी आउछ । यसका कारण बैंकहरुको लगानीमा खास असर पुगे जस्तो मलाई लाग्दैन । तर अटोमोबाइल डिलरहरुलाई भने असर पुगेको छ । यद्यपि डिलरहरुको व्यवसायमा असर पुग्नुमा समग्र अर्थ व्यवस्थाले नै असर पु¥याएको छ । अर्थ व्यवस्था राम्रो भयो भने ग्राहकको क्रय शक्ति बढ्छ । आर्थिक गतिविधि बढेमा समग्र व्यवसाय राम्रो हुन्छ ।


यो भन्दा पहिले १० प्रतिशत डाउन पेमेन्ट सम्मको चलन थियो बैंकहरुले ९० प्रतिशत सम्म लगानी गर्थे हाल त्यति लगानी गर्न नपाउदा केही असर पुगेको कि ?
बैंकलाई खासै असर पुगे जस्तो लाग्दैन । गाडी किन्न आउने मानिसहरुमा सामान्यतः यति धेरै तिर्नु पर्नेछ भन्ने मानसिकता हुन्छ । उनीहरु त्यसका लागि मानसिक रुपमा तयार भएका हुन्छन् र क्रय शक्ति अनुसार अगाडि बढ्छन् ।


पहिले अटो लोनमा विकृती पनि आएको पाइएको थियो कागजातको राम्रो अध्ययन नहुने, जथाभावी लगानी गर्ने आदि कारण लगानी जोखिमयुक्त बन्यो भन्ने कुराहरु पनि आएका थिए अहिलेको नयाँ प्रावधानले त्यस्ता विकृतीलाई हटाएको छ ?
अवश्य । अलि बढी नगद लगानी गरे पछि माया लाग्छ । माया गरे पछि गाडीलाई पनि राम्रो तरिकाले राखिन्छ । बैंकको बाँकी ऋण पनि तिर्नु पर्छ भन्ने हुन्छ । यसका कारण बैंकहरुको ऋण लगानी पनि सुरक्षित हुने रहेछ । त्यसैले राष्ट्र बैंकको पछिल्लो नीतिले केही राम्रो अवश्य गरेको छ ।


फर्स्ट टाइम बायरले २५ लाख देखि ३० लाखको गाडी किन्न खोज्छ । यो अवस्थामा मैले यति लगानी गर्नु पर्छ भन्ने मान्यता हुन्छ । जेन्युइन कस्टमर मात्र बैंकमा अटो लोनका लागि आउछन् । पहिले धेरै लोन लिनु पर्ने हुँदा मासिक रुपमा तिर्नु पर्ने किस्ता पनि धेरै हुन्थ्यो । तर अब किस्ता पनि कम हुने भएको छ । हिजोको दिनमा केही समस्या भए पनि हाल आएर भने सबैका लागि विन विन अवस्था छ ।


प्यासेन्जर सेगमेन्टमा मात्र बैंकहरुको लगानी बढी भएको अन्य सेगमेन्टका गाडीहरुमा चासो नदिएको आरोप पनि नि ?
प्यासेन्जर कार किन्नेहरुले आफ्नै सुविधाका लागि यसको उपयोग गर्छन् । उनीहरुको आर्थिक अवस्था, व्यवसाय, पारिवारिक अवस्था सबै अध्ययन गरी हामीलाई पनि लगानी गर्न सहज हुन्छ । त्यसको तुलनामा कमर्सियल भेइकलमा लगानी गर्न अलि समस्या छ । यद्यपि पहिले देखि नै यही क्षेत्रमा लागिरहेका व्यवसायीहरुमा भने ढुक्कका साथ बैंकहरुले लगानी गरिरहेका छन् । उनीहरु यो क्षेत्रमा कार्य गरिरहेको हुनाले बैंकहरुलाई ऋण लगानी गर्न पनि केही समस्या हुँदैन । तर कुनै नयाँ ब्यक्तिले अरुको लहैलहैमा लागेर लगानी गरौ न त भनेर आउने र पछि समस्या निम्तिने गरेको पनि पाइन्छ । मानौ एउटा कुनै रुटमा बस हाल्यो, तर उसमा यसको वारेमा केही ज्ञान हुँदैन । पछि बैंकलाई थाहै नदिई किनबेच हुने गरेको पनि पाइन्छ ।


नाडा अटो शो पछि दसैं तिहार जस्ता चाडपर्व पनि भित्रिदै छन् यसका लागि बैंकको योजना के छ ?
हामीले यही स्किम अन्तर्गत पुस मसान्त सम्म अटो लोन उपलब्ध गराउने छौ । यस अन्तर्गत १० बर्ष सम्म अवधि, बेस रेट शून्य दशमलव ५ प्रतिशत र डकुमेन्ट पूर्ण भएमा ३ दिनमा डेलिभरी गर्न सकिने व्यवस्था छ । बैंकले ११ दशमलव ०६ प्रतिशतको दरमा अटो लोन उपलब्ध गराइरहेको छ ।


अटो शोको विषयमा केही भन्नु छ ?
हामीले पहिले देखि नै अटो शोमा भाग लिइरहेका थियौ । तर बैंक एन्ड फाइनान्सहरुलाई यस वर्ष समेटिएन । हामीले त्यही बसेर हाम्रो स्किमको वारेमा अवलोकनकर्ताहरुलाई जानकारी दिन सकेनौ । अहिले यो सम्भव भएन । आगामी दिनमा अलि ठूलो स्थान मिलाएर सबैलाई समेट्न सकेमा राम्रो हुन्थ्यो । अटोमोबाइलसँग सम्बन्धित पार्ट्स, बैंक, फाइनान्स आदि समेत अटो शोमा सहभागी हुनु पर्ने हो । धेरै मानिसहरु बैंक र फाइनान्सहरुबाट अटो लोन लिएरै गाडी किन्छन् । त्यसैले उनीहरुको पनि अटो शोमा सहभागी हुनु पथ्र्यो ।


बैंकहरुले ब्याज दर बढाउदा ह्वात्तै बढाउने घटाउदा खासै नघटाउने गरेको आरोप पनि लाग्दै आएको यसको वारेमा तपाईंको भनाइ के छ ?
मलाई अन्य बैंकको वारेमा त थाहा छैन । तर माछापुच्छ्रे बैंकले अटो लोनमा राम्रो लगानी गरेको छ । बैंकमा भएको तरलता अनुसार ब्याज दर घट्ने वा बढ्ने हो । यसमा समग्र बैंकहरुले लिने नीतिले असर पु¥याउछ । तर एकै पटक धेरै ब्याज दर बढ्ने गरेको भने छैन । घटाउदा पनि अवस्था अनुसार घटाइरहेको छ ।


थप केही कि ?
अटो शो अलि ठूलो स्थानमा गर्दा राम्रो हुन्छ । हुन त यसका लागि स्थान अभाव भने छ । अनि अटो शोलाई आगामी दिनमा काठमाडौं वाहिर चितवन, पोखरा आदि स्थानमा पनि गर्दा राम्रो हुन्छ । यस्तो भएमा सो क्षेत्रका मानिसहरुले त्यही नै अटो शो हेर्न पाउछन् ।

 

 

Subscribe Now